Arisierung

Arisierig isch dr Begriff gsi, wo d Nazionalsozialiste bruucht häi, wenn si s Äigedum und dr Bsitz von ere Minderhäit, vo Juude oder Lüt, wo vo Juude abgstammt si, häi welle stääle, sig s im Dütsche Riich 1933 bis 1945 oder im ene aagschlossene oder bsetzte Land. Dä Raub isch äinzelne Lüt z guet choo, wo sich as „arisch“ bezäichnet häi und zur Meehrhäit vo dr Bevölkerig ghöört häi. Das sött underschiide wärde vo dr Beschlagnaamig bzw. Konfiszierig vo jüüdischem Äigedum dur e Staat, wo zum Däil gliichzitig mit dr Arisierig duuregfüert worde isch. D Arisierig wie au d Konfiszierig si Schritt gsi uf em Wäg zur Deportazioon vo de Juude in d Vernichdigslaager im Oste vo Öiropa. Für die bäide Arte vo Raub und Diebstaal häi d Nazi äxtra Gsetz und Verordnige erloo, so dass die Raubakzioone 'gsetzligi' Ufgoobe worde si.

Im erwiterete Sinn het mä dr Begriff au in andere Beriich brucht, z. B. im Kulturlääbe, und het mit em d Verdriibig oder Vernichdig vo jüüdische Kulturschaffende und Wüsseschaftler bezäichnet.